Flamur Noka: Programi i PD ofron mundësi për çdo shqiptar, 200 euro minimumi jetik për çdo qytetar

Sekretari i Përgjithshëm i Partisë Demokratike, Flamur Noka, gjatë takimit të zhvilluar në Katjel të Elbasanit, theksoi se programi i PD është i realizueshëm dhe ofron mundësi për çdo shtresë të shoqërisë, duke përfshirë të rinjtë, pensionistët, mësuesit, mjekët dhe profesionistët e lira.

Noka nënvizoi se Partia Demokratike, nën drejtimin e Sali Berishës, ka një program madhështor, i cili përbën një mundësi të jashtëzakonshme për Shqipërinë. Ai theksoi se ky program do të sjellë ndryshime reale dhe do të përmirësojë jetën e çdo qytetari shqiptar.

Në fjalën e tij, Noka shpalli një prej masave kyçe të programit: 200 euro do të jetë minimumi jetik për çdo qytetar shqiptar. Sipas tij, kjo shumë do të jetë një realitet i realizuar brenda 100 ditëve të para të qeverisjes së PD-së. Për më tepër, ai theksoi se pensionistët do të përfitojnë një rritje prej 20% në pensionet e tyre, duke siguruar që ata të mos varen nga ndihmat e të tjerëve për të mbijetuar.

Kjo iniciativë, siç shpjegoi Noka, synon të ofrojë siguri ekonomike dhe të luftojë varfërinë në Shqipëri, duke u mundësuar çdo shtrese sociale të jetojë me dinjitet.